NovaXove convoca ós internautas galegos para a nova edición do seu festival de música

O Certame NovaXove Music, que xa vai pola segunda edición e que consiste basicamente en dar a coñecer maquetas de grupos galegos noveis, inclúe fortes vínculos con Internet. O máis importante de todos eles ten que ver cos métodos empregados por Caixanova (que é quen organiza este festival, a través do seu servizo NovaXove) para convocar á mocidade galega fronte a estas agrupacións e artistas descoñecidos: a través dunha votación na Rede. O obxectivo dos promotores do certame, amais de achegar unha palestra virtual, pasa por superar a cifra de participación de grupos do ano pasado, que foi de medio centenar. A nova edición do concurso presentouse este mércores 18 na Coruña, nun acto no que se incidiu na súa liña a seguir (aberta, di NovaXove, a todos os estilos e propostas) e nas súas bases.
Neste senso, cómpre sinalar que os grupos que queiran participar deberán enviar un correo electrónico a NX para “a creación dun usuario específico que permita o envío dun tema en formato MP3 ó sistema informático do servizo, para a súa posterior publicación na sección de música”. Posteriormente, o weblog deste usuario específico converterase na fonte de información do grupo dentro do portal de NovaXove “cara ó resto do mundo”.
A partir de aí, os usuarios rexistrados do servizo web de Caixanova poderán levar a cabo as votacións. Cómpre sinalar que o prazo para a presentación de candidaturas fica aberto ata o 1 de novembro, coincidindo co prazo para as votacións. O anuncio dos finalistas realizarase o 10 de novembro, e a final do certame está prevista para o 23 de novembro, nun concerto en Santiago no que participarán os catro conxuntos ou artistas máis votados.
O premio consistirá (entre outras cousas) na gravación dun CD musical ou multimedia un estudo profesional de Galiza, amais dunha xira de promoción polas principais salas da nosa terra.