Asustek anuncia os prezos do Eee PC

O ordenador ultraportátil de Asus, o Eee PC, está a dar moito que falar, ameazando con eclipsar o XO-1 do proxecto OLPC de Negroponte e, de feito, dende Asustek anunciaron que un goberno xa lles encargou un millón de equipos mentres que do portátil de 100 dólares (que o final custa o dobre) só agardan fabricar 120.000 unidades no que queda de ano.
Agora xa se coñecen os prezos oficiais do Asus Eee PC, que terán ata 8 Gb de disco de memoria sólida, 1 Gb de RAM, cámara web integrada e unha batería cunha autonomía de ata 3,5 horas, mentres que o seu modelo máis básico terá 4 Gb de memoria sólida, 256 Mb de RAM, carecerá de webcam e a súa autonomía só chegará ás 2,8 horas. Os prezos irán dende os 7.999 e os 13.800 dólares taiwaneses, ou sexa, entre 172,14 e 296,98 euros, o que o converten nos equipo ultraportátiles co prezo máis competitivo do mercado, sendo así axeitados tanto para usuarios pouco esixentes como para os que prefiran a mobilidade á potencia.