Purple Violets será a primeira película estreada directamente en iTunes

O director Ed Burns estreará o vindeiro día 20 a súa película Purple Violets, pero en vez de verse nas pantallas dos cines, chegará directamente a iTunes, a tenda en liña de Apple. A película venderase a 14 dólares, de xeito que os interesados en ver esta comedia a poderán descargar no seu ordenador sen ter que acudir ás canles de distribución tradicionais.
Con este curioso lanzamento, a película independente pode chegar ó público sen contar co apoio das grandes produtoras de Hollywood, aínda que lle resultará complicado recuperar os 4 millóns de dólares que custou a peza audiovisual, pero fai posible a estrea dunha obra que doutro xeito non chegaría ó mercado.
A comercialización a través de iTunes podería considerarse unha estrea de verdade que non rivalizaría coa súa explotación en DVD no futuro, xa que a xente aínda non está afeita a ver vídeos descargados no televisor, de xeito que o máis habitual é velos no ordenador ou nun iPod, de xeito que podería ser un interesante xeito de aproveitar a plataforma de Apple coma promoción do filme protagonizado por Debra Messing, Selma Blair e Patrick Wilson.