Os rumores apuntaban ata o momento de que o iPhone con conectividade 3G chegaría a España da man de Telefónica en maio de 2008, pero as últimas informacións indican que o lanzamento do terminal podería demorarse ata finais do vindeiro ano, agardándose que o seu prezo de venda non supere os 399 euros e inclúa un compromiso de permanencia de 18 meses.
Éxito francés do iPhone
O pasado mércores France Telecom anunciou que durante os primeiros 5 días venderon preto de 30.000 terminais iPhone dos que un 48% foron a parar a novos clientes, o que confirma que o atractivo do móbil de Apple é un bo cebo para captar usuarios doutras operadoras. Esta cantidade de terminais pode parecer reducida comparada coas cantidades que se venderon inicialmente nos EE.UU., pero o certo é que posiblemente estean a vender o máximo de unidades posibles, xa que nas primeiras 21 horas xa se esgotaran os iPhone no 17% das tendas de Orange, e se rexistraron grandes colas nas principais tendas da operadora.
Parece que o percorrido europeo do móbil de Apple aínda será longo e produtivo tanto para a empresa de Steve Jobs como para as operadoras que distribúan o terminal en exclusiva.
