Brión acolle en febreiro un curso de balde sobre localización xeográfica na Rede

A localización xeográfica vinculada á Rede ábrese camiño. Isto que significa? Pois basicamente que ó internauta, cada vez máis esixente e máis familiarizado coa decodificación de diferentes feituras do comunicativo, gústalle saber o sitio exacto onde acontecen as cousas. Algo así como empregar os mapas coma un compás na maré da información. Amais diso, a xeolocalización a través das tecnoloxías ten amplas posibilidades no turismo, na venda en liña de calquera tipo de produto e, sobre todo, na Administración Electrónica.
Para afondar nisto, o Concello de Brión organiza un curso de balde de catro horas de duración e a desenvolver o martes 19 e o xoves 21 de febreiro, de 20 a 22.00 horas no Centro Social Polivalente.
O alicerce da actividade, na que podemos inscribirnos antes do 25 de xaneiro a través de www.briondixital.org (ou no teléfono 981 509 910), é ofrecer información útil sobre a localización de mapas, rutas, fincas a través de diferentes ferramentas habilitadas na Internet, como Googlemap, Sigpac ou a Oficina Virtual do Catastro. Cómpre sinalar que, amais desta iniciativa, o Concello de Brión promove o quinto módulo do curso de informática de usuario, que desta volta estará dirixido a informar sobre o emprego do programa Internet Explorer.
Na imaxe, xeolocalización de mosteiros galegos en vías de restauración habilitada na web do Consello da Cultura Galega.