Un terzo dos internautas galegos son creadores de contidos

Segundo unha investigación da que dá conta estes días Vieiros, Galiza é sen dúbida unha terra de sombras no afianzamento das redes e do dixital, pero tamén é un país de luces no desenvolvemento individual ou compartido de contidos. O estudo do que se poden extraer estas e outras conclusións sobre a tarefa a medio facer que é a chegada de Galiza á Sociedade do Coñecemento (pasamos case o limiar do porta, pero aínda temos medio corpo fóra) vén da man do enxeñeiro de montes Jorge del Río e leva o seguinte título: Atlas da Fenda Dixital no Estado Español 2007.
De entre todos os datos que achega sobre o nivel de acceso á Rede e as vantaxes que se tiran dela, hai uns cantos que nos tocan de preto de xeito especial. Por exemplo: que posición ocupamos no Estado no tema das redes? Segundo apunta a investigación, damos unha de cal e outra de area, de xeito semellante ás comunidades do terzo noroeste da Península.
Ou sexa, que a nosa baixa concorrencia na Internet vese compensada por uns niveis de actividade participativa alta abonda. Este dato non deixa de ser curioso, e move á reflexión sobre cómo serían as cousas se o número deses internautas con alto coñecemento do que teñen entre mans e das súas posibilidades fose máis alto. Dito doutro xeito: potencial non falta.
No estudo sinálase que o Estado español pódese dividir en dúas áreas máis segundo o nivel de conexión ás novas ferramentas e o emprego que se fai delas. Por unha banda, teríamos o sur, onde se tira partido da Rede como un medio de comunicación. Pola outra, está o nordeste, que en parte semella salientar polo contrario ca nós: a porcentaxe de cidadáns que se conectan é especialmente alto.
En Galiza, segundo os datos do estudo de Jorge del Río, hai a día de hoxe 717.217 galegos e galegas conectados, fronte ós 2.728.772 do censo oficial. Daquela cifra, 438.050 “vive dixitalmente” e, deles, 143.623 pódese considerar creadora de contidos.