ABC e Cox traballan en novos sistemas para evitar que fuxamos da publicidade

Os anuncios son cada vez máis coma vendedores con capacidade de movemento, na liña dos que che perseguen un treito nos centros comerciais e dos que moi dificilmente te libras se non trazas unha estratexia disuasoria (e respectuosa ó mesmo tempo, claro). O caso é que as novas canles dixitais están a darlle azos ós medios de comunicación para poñerlle pés e mesmo asas ós seus anuncios, que representan –a fin de contas- os seus ingresos. Nisto precisamente están a traballar en Estados Unidos cadeas como ABC e os sistemas por fío Cox Communications, que queren solucionar o principal atranco da publicidade nos servizos de vídeo baixo demanda: ó sermos nós os que mandamos no que vemos, tamén temos máis marxe de manobra para fuxir dos spots.
O caso é que ABC e Cox semella que xa saben onde metelos: a través dun servizo de VoD con tecnoloxía que nos impida esquivalos.
O sistema, no que levan a traballar dende hai meses, consiste basicamente en non permitir a función do avance que é propia dos sistemas de gravación dixital (Digital Video Recording) e que lles permite ós usuarios darlle ó rexistrado para diante cando hai un anuncio á vista. A ferramenta non varía as restantes capacidades do vídeo baixo demanda máis avanzado: permítenos ver en calquera intre a serie que queiramos. Pero iso si: roendo a publicidade.