Innovación destina preto de 110 millóns de euros ás axudas de I+D+i deste ano

A Consellaría de Innovación e Industria vén de anunciar que este ano 2008 vai destinar un total de 109.514.360 euros ás convocatorias de subvencións para Investigación, Desenvolvemento e Innovación en Galicia. Esta cantidade supón un incremento do 9,27 por cento con respecto a 2007 e do 131 por cento en relación a 2005, no que se destinaron 47,5 millóns de euros ás mesmas axudas.
O conselleiro Fernando Blanco foi o encargado —xunto con Salustiano Mato, director xeral de I+D+i—, de presentar estas subvencións que se convocarán de xeito inminente e que van permitir mobilizar un mínimo de 300 millóns de euros para o apoio de investimentos privados.
Estas achegas constitúen a principal fonte de financiamento público da investigación e da innovación para os axentes galegos de I+D+i e delas poderán beneficiarse o sector empresarial, os centros tecnolóxicos, os parques científico-tecnolóxicos, o Sistema Público de I+D (universidades, organismos públicos de investigación, entes e centros públicos de investigación), institucións sen arela de lucro e persoas físicas.
En total, son 9 as convocatorias de axudas que van destinadas a: Recursos Humanos, Promoción Xeral de Investigación, Programas Sectoriais de investigación aplicada, Fomento da Innovación Empresarial, Propiedade Industrial, Dinamización da Innovación, Comunicación e Sensibilización Social, Estruturación e consolidación de unidades de investigación e a nova convocatoria de Fomento do uso das deducións fiscais para actividades de I+D+i.
De todos eles, o Programa de Recursos Humanos é o que máis dotación acada, con 33,5 millóns de euros, destinados na súa maioría para crear líderes para a investigación e para aumentar a capacidade en recursos humanos dos centros de I+D públicos e privados de Galicia.