A Xbox 360 triplicou as súas vendas en España

Nas últimas semanas comentamos que o descenso de prezo da Xbox 360 ata 199,99 euros na súa edición básica afectou de xeito importante ás súas vendas, que nun principio poderían terse duplicado, pero agora Microsoft anuncia que as vendas xa superan o 300%, o que mesmo provocou casos de falta de unidades na canle de distribución do modelo Arcade, que está esgotado en moitos establecementos.
Ademais, o Grand Theft Auto IV podería ser un factor clave no aumento de vendas da Xbox 360, o que está a levar a algúns establecementos a vender packs coa consola e o popular xogo a un prezo moi atractivo (o xogo suporía un incremento do prezo da consola de só 10 euros, aínda que só se aplicaría ás versións Halo 3 e Elite).
Microsoft está a facer un investimento publicitario moi importante en España, precisamente co gallo do lanzamento do GTA IV (que hoxe mesmo mereceu a portada dun xornal estatal), polo que se poderían agardar uns bos resultados de vendas durante varios meses.