A galega El Muelle presenta os seus servizos de liñas 902 a empresarios de 5 países

A empresa informática galega El Muelle, especializada en novas tecnoloxías e servizos de Internet, vén de acordar con directores dos centros de promoción de negocios (CPN) do IGAPE en Alemaña, China, EE UU, Polonia e Xapón, unha serie de entrevistas nas que a empresa presentará os seus servizos perante os empresarios representantes dos mesmos.
El Muelle, que dende a súa oficina en Pobra do Caramiñal xa lles empresta traballos e ferramentas técnicas, subministros informáticos e asesoramento ás empresas da comarca do Barbanza, vén de dar agora un paso máis na súa aposta pola internacionalización dos seus servizos ofertándolles ós directores dos centros de negocio do IGAPE nos devanditos países unha serie de achegas que poden ser de interese ós empresarios dos mesmos que desexan ter presenza en España.
En concreto, a empresa galega vailles facer chegar ós diferentes directores os seus servizos de liñas 902 e servizos avanzados de voz que, por exemplo, permiten que as chamadas dos clientes poidan ser desviadas ós seus países de orixe para ser atendidos por persoal dos mesmos cun custo mínimo.
Segundo afirman os responsables de El Muelle, os recursos de Internet e as diferentes plataformas propias ou procedentes de acordos acadados con outras operadoras internacionais posibilítanlle á empresa poder emprestar este tipo de servizos “a uns prezos e condicións moi interesantes” para os seus clientes, de xeito que, na maioría dos casos, “os beneficios poidan chegar ata o 90 por cento en relación a empresas dominantes no noso país”.
As devanditas entrevistas terán lugar o vindeiro día 15 de maio en Santiago de Compostela no marco do Punto de encontro cos CPNs do IGAPE no exterior, e ás mesmas acudirá o xerente da firma galega, Fernando Cores Iglesias, quen presentará os seus servizos de liñas 902 de xeito personalizado a cada empresario.