LG presenta pantallas con formas elíptica e redonda

A feira da Society for Information Display (SID) que terá lugar en Los Ángeles (California) entre os vindeiros días 18 e 23 de maio será o lugar empregado por LG Display para presentar publicamente as súas novas pantallas LCD entre as que sorprenden un modelo con forma elíptica de 6 polgadas (a máis grande deste tipo desenvolvida ata o momento, cun ancho de 131,4 mm. e un alto de 78,8 mm.) e unha pantalla circular de 1,4 polgadas (ou sexa, cun diámetro de 35,5 milímetros) que mesmo podería introducirse en esferas de reloxos de pulso. Ambas pantallas permiten amosar ata 262.000 cores e teñen un ángulo de visión de preto de 160 graos.
Estas novas pantallas poderían ser moi axeitadas para elementos do fogar (coma marcos dixitiais), para o interior de automóbiles ou para distintos dispositivos portátiles coma móbiles, reloxos ou consolas de videoxogos.