Amigos da Terra convoca na Rede un día sen bolsas de plástico (este sábado 14)

Amigos da Terra está a facer unha convocatoria na Rede dirixida a facernos reflexionar sobre o noso xeito de vida cotiá. Máis polo miúdo, a convocatoria é clara abondo e ten un obxectivo ben determinado: a idea é facernos pensar na comenencia de usar ou non algo ben específico, as bolsas de plástico. A proposta, que emprega a Rede polo que ten de ferramenta mobilizadora (rápida e directa), sinala unha xornada, a do 14 deste mes (o sábado que vén), coma xornada simbólica para deixar de lado e dunha vez por todas uns obxectos que nin nos axudan a carretar mellor as cousas que mercamos (a quen non lle ten pasado o de que se rompan no intre menos axeitado?) nin contribúen ó respecto polo medio natural.
Por se isto fose pouco, informan Amigos da Terra, axudan a perpetuar os conflitos bélicos orixinados polo control do petróleo, sendo as bolsas de plástico un dos seus principais derivados.
Pero a cousa non fica aí. Segundo un informe da dita organización, o Estado español non salienta especialmente no panorama mundial pola busca de alternativas. De feito, é o é o primeiro produtor de bolsas de plástico dun único uso en Europa. Os comercios distribúen 10.500 millóns de bolsas (238 por persoa) ao ano, que son unhas 100.000 toneladas de plástico.