Microsoft creará un centro tecnolóxico para afianzar o seu buscador en Europa

Microsoft non quere perder peso en Internet, e menos a costa de Google, o buscador que segue a ser empregado por máis internautas en todo o mundo. Con este obxectivo de reforzar a súa presenza na Rede, e máis concretamente na Rede europea, a multinacional de Redmond vén de anunciar a posta en marcha (durante a segunda metade de 2008 ou a primeira de 2009) dun Centro de Buscas Tecnolóxicas (Search Technology Center, STC) no continente. Máis polo miúdo e en palabras da propia Microsoft, o centro terá a seguinte misión: incentivar os investimentos no buscador Live Search da casa e obter meirande relevancia tanto en procuras como en publicidade en liña.
O centro de investigación, que aínda non ten sede definitiva, contará coa achega de grupos de enxeñeiros procedentes de distintas cidades europeas co fin de optimizar as buscas e, en última instancia, contribuír a que divulgar a seguinte idea: pode haber máis vida alén de Google. Neste caso concreto, a alternativa viría da man de Live Search, o buscador de Microsoft, agora en fase de relanzamento en Europa.