O PSdeG aposta pola Rede no seu 11 Congreso Nacional

Este serán Ricardo Varela, secretario de organización dos socialistas galegos, presentou en rolda de prensa o 11 Congreso Nacional do PSdeG-PSOE que terá lugar os días 26 e 27 de xullo, e utilizará coma lema a forza de Galicia, co que pretenden expresar con claridade «o que queremos trasladar: un partido forte nunha Galicia forte».
Varela explicou que a pretensión dos socialistas é que do Congreso saia un partido que defenda Galicia coma un país «socialmente protexido, territorialmente cohesionado e tecnoloxicamente avanzado», e nesta última liña o certo é que están a sorprender, pois nos últimos meses o PSdeG incrementou a súa presenza na Internet de distintos xeitos, facendo uso de redes sociais coma Facebook (que serviu para a elección do lema do Congreso), achegándose aos seus simpatizantes mediante Twitter, presentando as súas instantáneas do día en Flickr ou manifestando as opinións de moitos dos seus representantes en militantes a través dos seus propios blogs.

Camiñando na mesma dirección, tamén contan actualmente coa canle de vídeo coñecida coma PSdeGTV e co gallo do Congreso Nacional tamén crearon un blog no que informan sobre o cónclave no que participarán 500 delegados, 500 observadores, 250 membros de órganos nacionais e 300 convidados.