Os habitantes do casco histórico compostelán poderán contratar conexión á Rede sen fíos

O pasado venres a concelleira de Rehabilitación e Cidade Histórica de Santiago de Compostela, Olga Pedreira, fixo pública a adxudicación da posta en marcha da rede WiMAX para o casco histórico da capital de Galicia, que estará a pleno rendemento en 2009 e que ofrecerá acceso á Internet de balde en 11 espazos públicos aínda por determinar, así como contará con tarifas vantaxosas no resto da zona monumental.
Deste xeito, unha serie de espazos escollidos poderán empregarse para acceder á Internet mediante tecnoloxía Wi-Fi, mentres que os comerciantes e habitantes da zona vella poderán optar tamén por esta solución tecnolóxica para contratar unha conexión de acceso á Rede.
Para os residentes a conexión tería un custo mensual de 25 euros (para unha conexións de 0,5 Mbps) e de 39 euros (para 1 Mbps) aos que habería que engadir unha cota de alta de 90 euros, aínda que tamén haberá a posibilidade de contratar bonos para o uso un determinado número de horas.
Os servizos que se achegarán dende a nova rede WiMAX comezarán a pórse en marcha no último trimestre do presente ano, nun proxecto do que resultou adxudicataria a empresa Colabora. O importe da adxudicación é de 367.686 euros para o subministro e 16.000 euros/anos para a xestión do servizo.