Google lanza a versión de proba de Picasa 3.0

O servizo de organización e publicación de fotografías de Google, Picasa, leva xa máis de 2 anos facendo doado ter os nosos álbums na web e agora o Picasa Web Albums actualízase para incorporar etiquetas de xeito que podemos identificar rapidamente á xente nas nosas fotografías, para despois poder organizalas segundo a xente que sae nas mesmas. Esta novidade sorprende porque fai uso dunha tecnoloxía de identificación facial que agrupa caras semellantes (que poden corresponder á mesma persoa) para que resulte moito máis doado e rápido etiquetar á xente.
Pero os cambios non quedan na web, senón que a aplicación Picasa tamén estrea a versión de proba da súa terceira versión, incorporando a opción de sincronizar coa web os álbums que marquemos, novas opcións para retocar as imaxes (axudando a restaurar fotografías, detectar e eliminar o efecto de ollos vermellos ou incorporar textos ás imaxes dun xeito atractivo) e incluso a posibilidade de crear composicións e presentacións coas nosas fotografías, con certa liberdade creativa sobre a composición e os modelos empregados.

Vídeo de presentación das características de Picasa 3.0