O Campus de Pontevedra acolle un curso de iniciación na Web 2.0

A vicerreitoría do Campus de Pontevedra organiza do 27 de outubro ao 7 de novembro un obradoiro que baixo o título de Web 2.0 e blogs para todos pretende instruír aos asistentes na produción de contidos para blogs, podcasts ou videoblos, así como a participación en redes sociais, non sendo preciso ter coñecementos de programación para aproveitar as xornadas que se desenvolverán os luns, mércores e venres entre 19:00 e 21:00 horas na Casa das Campás.
O responsable de impartir o curso será Diego Fernández Pérez, licenciado en Belas Artes e deseñador e profesor da escola de deseño Aula D de Vigo, e pretende que ao remate das xornadas os asistentes non teñan problemas en crear galerías fotográficas na web, subir vídeos a YouTube ou crear un blog propio.
O obradoiro está aberto a calquera persoa interesada, é de balde e o seu prazo de matrícula (que se fai a través da Internet) remata este venres.