A campaña do 1×2 do proxecto OLPC chega a Europa

A campaña solidaria Get One, Give One (G1G1), que se lanzou nos EE.UU. hai exactamente un ano, chegará agora a Europa, de xeito que os cidadáns que queiran contribuír ao proxecto OLPC para achegar portátiles aos cativos de países en vías de desenvolvemento poderán mercar un portátil XO-1 por 312 euros máis gastos de envío (sen IVE), o que sería o dobre do que custaría o pequeno portátil, de xeito que se subvencionaría un equipo para un cativo.
Por desgraza, estes equipos que se pedirán a través de Amazon, incluirán o teclado en inglés e chegan cun ano de retraso, polo que non aproveitan a curiosidade inicial que espertaba o proxecto, pois a campaña chega nun momento no que os ordenadores ultraportátiles están moi ben colocados no mercado, e gozando de boas vendas, polo que un cidadán que queiran mercarlle un ao seu fillo dificilmente optará polo XO-1 do proxecto OLPC, xa que existen equipos máis axeitados nas tendas (e a solidariedade non foi o principal promotor do éxito da campaña do pasado ano nos EE.UU.).
A principal eiva que podería atopar o XO-1 sería a incógnita que supón o seu servizo técnico en Europa, xa que non está amparado por fabricantes tradicionais, como acontece con Classmate PC de Intel, os Airis Kira ou outros ultraportátiles.