A RAG dixitalizará os seus fondos

O presidente da Real Academia Galega, Xosé Ramón Barreiro Fernández, e a conselleira de Cultura e Deporte, Ánxela Bugallo, asinaron un convenio que permitirá levar a cabo a dixitalización de boa parte dos arquivos da RAG para polos á disposición do público xeral (que os poderá consultar a través da Internet), contando este proxecto cun orzamento de 149.000 euros achegados pola Fundación Cidade da Cultura.
Aos documentos da Real Academia se irán sumando os fondos das principais institucións culturais de Galicia, para o que se desenvolverán outros acordos que permitan a incorporación da cultura galega á sociedade do coñecemento a través da dixitalización dos principais documentos culturais de calquera tipo (escritos, sonoros e audiovisuais). Tamén se pretende recuperar fondos documentais inéditos ou pouco coñecidos, que se poidan atopar depositados fóra de Galicia ou dispersos en varias localizacións.