O iPhone incorpora o servizo Google Street View e a descarga sen fíos de podcasts

Tras varias revisións de pouca importancia chega a versión 2.2 do firmware do iPhone, que incorpora moitas melloras agardas polos usuarios dende hai tempo, aínda que tamén mellora a seguridade do terminal de cara á súa liberación e á instalación de aplicacións non oficiais.
A actualización máis visible da revisión do iPhone é a incorporación de Google Street View ao seu sistema de Mapas, ao que tamén se engaden indicacións en transporte público e a pé, a visualización da dirección dos puntos de interese sinalados con chinchetas e a posibilidade de compartir unha ubicación por e-mail. Outras das grandes melloras introducidas sería a relativa aos podcasts, xa que a partir de agora non será preciso sincronizar o iPhone co ordenador para poder cargalos no seu disco, podendo facer tal operación tanto a través de Wi-Fi coma de 3G, de xeito que se fai moito máis cómodo e rápido o seguimento de contidos sonoros achegados a través de fluxos RSS.
Tamén mellora a aplicación de correo electrónico, o Safari é máis estable e se responde a unha das máis insistentes demandas dos usuarios: se permite activar e desactivar a función de corrección automática nos axustes do teclado.
Paralelamente, e como vén sendo habitual, o iTunes tamén se actualizou para adaptarse á nova versión do iPhone, incluíndo tamén unha importante mellora: un sistema de ditado (VoiceOver) que permite que os usuarios con problemas de visión poidan achegarse aos textos presentados en pantalla.