Expulsan de Xbox LIVE a unha lesbiana por manifestar a súa condición sexual no seu perfil de usuario

Os problemas de tolerancia e convivencia que se dan no mundo real poden trasladarse de xeito doado ás plataformas virtuais, nesta xornada moitos medios están a denunciar o que parece un caso de homofobia no servizo Xbox LIVE, aínda que podemos entender o suceso coma un mero conflito entre xogadores en rede.
A polémica nace da denuncia dunha usuaria de Xbox LIVE chamada Teresa, e que no seu perfil de xogadora se auto-define coma lesbiana, o que outros xogadores consideraron ofensivo, polo que acosaron á moza, perseguíndoa nas súas partidas en distintos xogos e instaron a outros xogadores a votar negativamente a esta xogadora. Finalmente a rapaza foi vetada do servizo por indicar as súas preferencias sexuais no seu perfil, o que incumpre claramente as condicións do servizo (que non permite a manifestación de tendencias políticas, sexuais ou relixiosas precisamente para evitar este tipo de problemas).
Dende Microsoft aseguran que están a traballar para evitar que se remitan incidentes semellantes, pero podemos lembrar que nos últimos días tamén comezaron a prohibir o uso da palabra gay no nome de xogador dos seus usuarios, ante queixas recibidas por xogadores que se sentiron ofendidos por nomes coma theGAYERgamer (o xogador máis gai).