Yoigo, o cuarto operador de telefonía móbil de España, vén de anunciar a rebaixa dos seus prezos para chamadas, navegación por Internet e SMS realizadas en roaming dentros dos países da Unión Europea e asociados.
Deste xeito, a partir do vindeiro día 1 de xullo, chamar en roaming dentro dos devanditos territorios custará con Yoigo 31 céntimos por minuto (35,96 céntimos/minuto IVA incluído).
No primeiro minuto de conversación, aos 31 céntimos hai que engadirlles o prezo de establecemento de chamada, que é de 12 céntimos (13,92 céntimos IVE incluído), polo que o primeiro minuto completo axustaríase aos 43 céntimos/minuto que fixa a Comisión Europea. A partir de aí, o minuto custa 31 céntimos, o que supón un 28 por cento menos que o prezo máximo marcado pola CE.
Rebaixa dun 66 por cento na navegación por Internet
Por outra banda, Yoigo vén de baixar os seus prezos de navegación por Internet en roaming dentro dos países da UE e asociados nun 66 por cento. O prezo descende dos 0,009 euros/KB actuais (0,01044 euros IVE incluído) a 0,003 euros/KB (0,00348 euros IVE incluído) a partir do vindeiro 1 de xullo.
O obxectivo é, segundo anunciou o conselleiro delegado de Yoigo, “que sair de viaxe e estar conectado sexa compatible”.
En canto ao resto de prezos para roaming na Unión Europea e países asociados, o prezo dos SMS queda en 11 céntimos (12,76 IVE incluído), e no dos MMS mantense en 90 céntimos (1,044 euros IVE incluído).
Estas tarifas entrarán en vigor a partir do vindeiro día 1 de xullo de xeito automático e sen que o cliente teña que darse de alta. Yoigo vai informarlle aos seus usuarios a través dun SMS, indicando a data de comezo da aplicación das tarifas e facilitará toda a información relativa a esta iniciativa na súa páxina web e no teléfono gratuíto 633 800 800.
