A CiberIrmandade da Fala estrea nova web, en fase de probas

A CiberIrmandade da Fala vén de estrear, en fase de probas, a súa nova web oficial, máis funcional e atractiva, na que destacan os foros, as novas e os anuncios de balde que a organización pón a disposición de tódolos usuarios e usuarias para o que desexen publicar.
As novas ligazóns e apartados cos que conta esta ferramenta son, entre outros: – “Foros integrados na web”: Rexistro e identificación únicos e compartidos entre web e foros, coa intención de facilitar a presenza activa dos usuarios e usuarias nas duas ferramentas. – “Publicación de novas”: a nova web da CiberIrmandade permite que tódolos internautas publiquen as súas propias novas e contidos. Os antigos usuarios e usuarias, tanto da web como dos foros, non teñen que volver a rexistrarse para entrar na ferramenta e dar a coñecer calquera asunto relacionado coa nosa língua, cultura, sociedade… asemade, os internautas que desexen participar coas súas opinións e artigos, non teñen máis que rexistrarse e publicar o que consideren a ben. – “Eventos”: o novo deseño desta web conta agora cun apartado especial para ubicar as convocatorias ou datas de eventos importantes para a cultura galega. Calquera usuario sabedor da existencia dalgún acto relativamente importante para a socieade galega, só ten que entrar na web e introducilo neste apartado. – “Anuncios de balde”: ainda en fase experimental, esta sección ofrece un espazo para que os usuarios da web, sexan particulares, asociacións ou empresas, poidan anunciar o que consideren, sen ningún custe adicional ou molestia, mais sí coa obrigatoriedade de facelo en galego.
A nova ferramenta virtual da CiberIrmandade da Fala tamén vén de sufrir un cambio no relativo ás novas da portada, que non serán todas as publicadas, senón as máis vistas de entre todas as enviadas.
Porén, este proxecto aínda está en fase de probas polo que os usuarios e usuarias que o desexen poden opinar sobre o novo deseño e enviar suxestións que serán tidas en conta polos responsables da aplicación para mellorala en todo o que estea da súa man.