Aproban a lei HADOPI en Francia

A lei HADOPI volveu á Asemblea Nacional francesa despois de que o Tribunal Constitucional botase por terra a súa anterior formulación, de xeito que agora desaparecerá a figura dunha autoridade administrativa que poida cortar o acceso á Rede aos usuarios que descarguen contidos protexidos por dereitos de autor, de xeito que deberá ser un xuíz que teña que valorar os casos e as sancións correspondentes. Amais, os usuarios conservarán o seu dereito á presunción de inocencia.
A nova lei aprobouse con 285 votos a favor e 225 en contra, e entrará en vigor no mes de outubro. Con novo regulamento confírmase a creación dunha autoridade que vixiará a Internet e advertirá aos usuarios que realicen descargas ilegais, entrando os trámites sancionadores a partires do terceiro aviso, e aínda que a formulación da lei non é definitiva, non parece que vaia ter problemas en seguir adiante unha vez superados os detalles máis polémicos da súa formulación inicial.