Usuarios de Twitter rompen co embargo informativo dun caso de polución en África

Coa Rede non hai quen poida. Nin sequera as forzas de todo tipo que a longo da historia teñen mantido en segredo, provisionalmente ou non, un variado abano de verdades. As circunstancias en que a resolución dunha incógnita abrolla son moitas e diferentes, pero poucas veces está tan xustificado se do que estamos a falar é dunha cuestión de saúde pública e degradación do medio natural. Este foi o miolo dun caso de información retida no que a comunidade internauta inglesa tivo o papel de liberadora desa información, e todo malia haber orde xudicial de por medio: a que obrigaba a The Guardian a manter en segredo un estudo sobre un caso de contaminación causado por unha gran empresa en Costa de Marfil (na imaxe). Co que non contaba o xuíz foi co Twitter e outras ferramentas da Internet social.
Segundo conta El País, a historia remóntase a 2006, no intre en que a firma de transporte Trafigura decidiu desfacerse de 400 toneladas de gasolina de baixa calidade aboándolle unha taxa compensatoria ao Goberno de Costa de Marfil. Como adoita a acontecer neste tipo de cuestións, as medidas de coidado medioambiental para vixiar a rigorosidade do transvase foron de todo menos esixentes. Finalmente, a gasolina foi dar ás proximidades da cidade de Abidjan. Segundo The New York Times, a cifra de persoas afectadas foi de 85.000, cantidade e feitos que son máis graves aínda tendo en conta a precariedade sanitaria e económica do país.
O caso é que a culpabilidade de Trafigura aínda estaba por recoñecer, ficando os datos que a certificaban definitivamente nun informe que foi a dar a mans de The Guardian. Malia as esixencias da multinacional por mantelo en segredo, a Rede fixo o seu traballo: favoreceu o fluxo de información. Así, logo de que fose dar á Wikileaks xusto antes da prohibición xudicial, os internautas que estaban ao tanto da cuestión puxéronse mans á obra, sobre todo en Twitter, chamando á desobediencia entre os reporteiros británicos para que ligaran coas mensaxes da dita rede social e alimentando con novas proclamas o escándalo informativo xa de por si considerable. Conclusión: a propia empresa fixo público o documento a semana pasada acompañado dunha carta na que se tenta aclarar que non se trata dun estudo concluínte que posibilitara albiscar os problemas provocados.