A exposición itinerante Galiciadixital achega as novas tecnoloxías aos maiores e propón en Barbadás unha viaxe interactiva pola comunidade

A Secretaría Xeral de Medios achega unha vez máis as novas tecnoloxías aos maiores esta vez a través da exposición itinerante Galiciadixital que se atopará na Residencia de Maiores Nosa Sra. dos Milagres de Barbadás ata o vindeiro 2 de novembro. A mostra, organizada pola Secretaría Xeral de Medios, en colaboración coa Secretaría Xeral de Familia e Benestar, poderá visitarse gratuitamente en horario de 10:00 a 13:00 e de 16:00 a 20:00 horas.
O secretario xeral de Medios, Alfonso Cabaleiro Durán, inaugurou hoxe a mostra salientando o interese do seu departamento en amosar aos galegos e galegas de todas as idades o audiovisual e os multimedia realizados por empresas e universidades galegas. A través desta exposición a Secretaría Xeral de Medios pretende tamén promover a interrelación entre mozos e maiores xa que varios colexios deste municipio visitarán ao longo destes días esta mostra, pensada para que os visitantes non sexan simples espectadores, senón que participen en todo o seu percorrido.

Durante o acto, que contou coa presenza dun grupo de representantes da Cruz Vermella e do Club de Xubilados do municipio, ademais dos residentes de Nosa Sra. Dos Milagres, o alcalde de Barbadás, Xosé Manuel Freire Couto, e o delegado territorial da Xunta de Galicia en Ourense, Rogelio Martínez González, invitaron a todo o municipio a visitar a exposición e agradeceron esta oportunidade á Secretaría Xeral de Medios.
A exposición itinerante chega a Barbadás dende o municipio de Salvaterra do Miño, onde recibiu a visita de más de mil seiscentas persoas. Galiciadixital ofrece unha experiencia interactiva distinta á dos museos convencionais achegando os avances en tecnoloxías multimedia e audiovisuais producidas en Galicia á cidadanía dende localidades preto da súa residencia.