Crean Jobsket, unha nova plataforma de busca de emprego

Tres novos emprendedores, entre eles un galego, o betanceiro Martín Pérez, acaban de lanzar unha aplicación de Internet que promete cambiar a forma na que buscamos emprego. Trátase de Jobsket unha aplicación en liña que pretende combinar a procura tradicional de emprego cos mundos das redes sociais e a caza de talentos, ofrecendo novas alternativas á hora de promocionarse persoalmente e buscar emprego. Os creadores desta plataforma son ademais de Pérez, o oscense Daniel Latorre e o catalán Jordi Monné.
Unha das características máis novas desta aplicación é que o candidato pode publicar o seu currículo en Jobsket e a aplicación mostraralle cal é o seu valor no mercado. A diferenza doutros servizos, o usuario non ten que introducir ningún tipo de dato máis que o seu propio currículo xa que Jobsket automaticamente encargarase de calcular este valor. Para realizar isto, a ferramenta utiliza tecnoloxía de análise semántico de datos para estimar o valor dos currículos persoais baixo uns parámetros como o lugar onde estivo traballando, que postos exerceu e cales son as súas habilidades, cruzando estes datos coas máis de 125.000 entradas sobre salarios que dispón na súa base de datos. Todo isto unido á experiencia do candidato, o seu historial salarial e o seu soldo desexado permiten a Jobsket o tentar estimar canto vale o currículo dunha persoa.
Ademais de recibir esta estimación, o candidato pode subir varios currículos se o desexa. Jobsket utiliza a súa tecnoloxía semántica para mostrar ao candidato as palabras claves en cada un dos seus currículos, así como para recomendar inmediatamente ofertas de traballo que se axustan ao seu perfil. Jobsket mestura tamén conceptos de rede social polo que os candidatos poden ter os seus contactos, recomendar a outras persoas ou mesmo compartir o seu currículo noutras redes sociais como Facebook ou Twitter ou directamente publicalo na súa páxina web ou blog.
Jobsket aspira a converterse nunha ferramenta utilizada por todo tipo de persoas, xa sexan persoas sen emprego ou traballadores en activo, xa que ademais de funcionar como un portal tradicional de emprego onde son os candidatos son os que se inscriben nas ofertas, Jobsket encárgase de recomendar ás empresas os perfís máis adecuados para as ofertas que publicaron no portal. Téntase deste xeito facer máis fácil o labor das empresas e achegalas a modelos de caza de talentos tan populares e utilizados no resto de Europa. O servizo acaba de lanzarse para empresas e espérase que en pouco tempo increméntense substancialmente as ofertas que se publiquen.
Os creadores de Jobsket apostaron por esta nova plataforma ao comprobar que «a procura de emprego por Internet neste país atópase aínda ancorada en tecnoloxías do pasado». O atopar traballo é unha tarefa que ocupa demasiado tempo. A experiencia no campo internacional de parte do equipo creador facilitou o desenvolvemento deste proxecto.