Un experto en seguridade alemán atopa un método para desprotexer as redes de telefonía móbil GSM

Durante o Chaos Communication Congress o experto en seguridade informática Karsten Nohl realizou unha presentación na que deu a coñecer a vulnerabilidade do sistema de cifrado empregado actualmente polo sistema de telefonía móbil GSM, empregado actualmente polo 80% das chamadas realizadas a nivel mundial, de xeito que pretende así advertir da falta de seguridade nas comunicacións móbiles actuais.
O método empregado para superar a protección nas comunicacións móbiles permitiría a clonación de números, a suplantación de identidade, a intercepción, a decodificación, o espionaxe ou o colapso de chamadas, en definitiva, deixa totalmente exposta unha tecnoloxía de uso extensivo que precisa dunha actualización de seguridade. De feito, a Asociación GSM está bastante molesta coa publicación realizada por Nohl (quen realizou a investigación con fins académicos, tomando precaucións para non cometer ilegalidades durante a súa análise de redes GSM), pois consideran que está a por en perigo a seguridade de toda a rede de comunicacións móbiles, aínda que polo momento a vulnerabilidade detectada é teórica e non parece probable que vaia a aproveitarse na práctica, pois polo momento o método anunciado resulta pouco eficiente, o que podería cambiar en poucas semanas (de depurarse o código presentado).