O HTC Desire normaliza a súa comercialización en España

O terminal telefónico co sistema operativo Android 2.1 HTC Desire é un dos máis agardados no mercado español, en boa medida por ser o máis semellante que ten a un irmán o Nexus One que comercializa Google (e que resístese a chegar a España), pois é do mesmo fabricante e as súas diferenzas son minúscula; e aínda que nos últimos días son múltiples as informacións que comentaban a súa comercialización por parte de Orange e Vodafone, non foi ata esta mañá cando o móbil entrou a formar parte do programa de puntos de Vodafone (levaba máis dunha semana no catálogo de puntos de Orange), co que vai completándose a súa incorporación ás compañías de telefonía que o viñan anunciando, aínda que xa era posible adquirilo con anterioridade a través da cadea de tendas The Phone House.
Dende a operadora británica advirten que para particulares o terminal será, polo momento, exclusivo para clientes actuais, o que podería vir provocado por un problema de provisión de terminais (Vodafone tivo problemas para atender os pedidos do HTC Desire no Reino Unido nas últimas semanas) e por unha promoción dirixida a autónomos e empresas (aínda non lanzada) na que poderíase adquirir o prezado móbil de balde (no caso de autónomos, mentres que os empresarios deberían pagar 49 euros) ao subscribir o Plan Conecta Voz e Internet en portabilidade. A tarifa contratada tería unha permanencia de 18 meses e consistiría nun plan de voz con 1.000 minutos/mes a teléfonos nacionais entre as 8:00 e as 20:00 horas e unha tarifa plana de datos cun máximo de transferencia de 250 Mbytes (que baixaría a súa velocidade a 64 Kbps en caso de superar tal límite).
No caso de usuarios particulares que queiran facerse co HTC Desire a través do plan de puntos, os prezos que terían que pagar irían dende os 479 euros con 100 puntos e sen permanencia ata de balde con 5.000 puntos e un compromiso de permanencia de 18 meses. Estes prezos parecen substancialmente máis caros que os de Orange, que por 250 puntos ofrece o terminal por 269 euros, podendo reducirse o seu prezo ata 39 euros con 3.500 puntos.