Os competidores de Apple negan que os seus móbiles teñan problemas de cobertura coma o iPhone 4

A polémica ao redor dos problemas de cobertura do iPhone 4 está lonxe de rematar pois dende Apple, en vez de recoñecer o seu erro con humildade, dedicáronse a apuntar que outros móbiles do mercado presentaban defectos semellantes, o que está a provocar unha resposta unánime da competencia, que considera inaceptable que Apple queira desviar a atención sobre os seus erros dese xeito, e incluso negan a veracidade dos exemplos que publica Apple na súa páxina web.
Dende Nokia aseguran nun comunicado que «o deseño da antena é un asunto complexo» no que son pioneiros (foron os primeiros fabricantes en comercializar móbiles con antenas internas) e tamén engaden que o xeito no que o usuario colle o teléfono debe terse moi en conta, algo no que parece fracasar Apple.
Dende RIM tamén están ofendidos polo feito de que Apple poña coma exemplo ao seu BlackBerry Bold 9700, e aseguran que ningún usuario dunha BlackBerry ten que empregar unha funda para utilizar o seu móbil sen problemas, mentres que dende HTC queren desacreditar a Apple por utilizar o seu Droid Eris para ilustrar o problema da antena noutros terminais, xa que a taxa de devolución deste último móbil sería do 0,016%, mentres que o iPhone 4 ten unha taxa de devolución do 0,055%.
Outro dos móbiles que Apple colocou na picota foi o Samsung Omnia II, e dende a compañía surcoreana negan que teñan problemas de cobertura, pois sitúan a súa antena na parte inferior (mentres que o iPhone 4 faino nun lateral) mantendo distancia coa man do usuario.
Despois destas redaccións dá a impresión de que os competidores de Apple teñen motivos máis que fundados para reaccionar, pois non hai que esquecer que o bloqueo da antena do iPhone 4 coa man do usuario corresponde a un agarre natural coa man esquerda, mentres que replicar o efecto noutros terminais é algo que non parece tanto doado, e non parece ser percibido na práctica por usuarios finais (algo que si fixeron multitude de usuarios do iPhone 4 nos EE.UU.).

Vídeo no que pode verse cómo un HTC Droid Eris perde cobertura cun agarre claramente forzado