As administracións galegas terán acceso de balde ao servizo de certificación e sinatura dixital da Xunta

A Xunta vén de anunciar a posta a disposición de diversas administracións e institucións dos seus servizos de certificación e sinatura dixital. Esta medida impulsada pola Secretaría Xeral de Modernización, orientada a permitir un aforro de custes e un avance no uso da Administración Electrónica, beneficiaría aos concellos galegos, as deputacións provinciais, as tres universidades galegas, o Consello de Contas, o Valedor do Pobo e ao Parlamento galego. Co fin de facer destas e outras iniciativas unha realidade, o dito departamento vén de adxudicar á Fabrica Nacional de Moeda e Timbre (FNMT) o servizo de certificación dixital “que posibilitará a adaptación da Administración autonómica aos requirimentos da Lei 11/2007 de acceso electrónico dos cidadáns aos servizos públicos”. Estes servizos serán achegados de balde ás entidades públicas galegas.
Segundo engade Modernización, o orzamento desta iniciativa é de 955.000 euros para un período de dous anos. O obxectivo disto e da “centralización do custe” é permitirlles un aforro importante ás administracións galegas, evitándolles levar a cabo unha contratación individual no caso de ter que solicitar o servizo pola súa conta. Este posibilitaría, entre outras cousas, “a incorporación de certificados dixitais non dispoñibles ata agora, como por exemplo os certificados de empregado público ou de sede electrónica, e a continuación doutros que xa se estaban a empregar na Xunta e que arestora estarán tamén dispoñibles para o resto das entidades públicas galegas”, engade o Goberno galego.