R deféndese do informe que fala dunha baixada na calidade do seus servizo

Con motivo dos datos achegados pola Unión de Consumidores de Galicia (descargable en formato PDF) acerca dunha baixada de calidade nos produtos e servizos subministrados polas operadoras do ámbito estatal, datos dos que falamos onte nesta web, cómpre sinalar que para unha das empresas máis prexudicadas polo dito informe da UCGAL, a firma galega R, é preciso facer unha serie de aclaracións. En primeiro lugar, sinala, na dita información só “viña correctamente referenciado o dato do tempo de conexión”, cousa que por outra banda xa foi corrixida dende o devandito organismo e que R agradece publicamente. Polo que respecta ás conclusións do estudo, a compañía galega xa manifestou o seu completo desacordo co punto no que se dá conta dunha baixada de calidade do seu servizo de 2008 a 2009.
R di non entender que se fale disto pero que non se faga referencia aos datos da SETSI (dos que se nutre o estudo dos consumidores) de 2008, datos nos que “R mellorou en case tódolos apartados nese período”. E prosegue: “No estudo indícase que R experimentou unha suba dos seus prezos no establecemento das chamadas nacionais; en 2009 o cen por cen dos nosos clientes particulares contaba na súa liña con chamadas gratis a todos os fixos nacionais; é dicir, ningún cliente de R pagaba falar nin tiña que abonar establecemento de chamada, porque eses conceptos van incluídos na cota da liña”. Ou sexa que, sinala a operadora, “que se limita unicamente cada chamada a 120 minutos, pero o cliente pode colgar e chamar cantas veces queira; se unha chamada excede de 120 minutos, o exceso cóbrase a 0,03€+IVE”.
A maiores, R tamén ten algo que dicir sobre a suba do establecemento que se sinala nos informes, xa que para a operadora galega a Unión colleu de xeito erróneo as chamadas nómades non xeográficas, ou sexa, “os números que comezan por 5”. E segue: “Estes números son moi concretos e non teñen nada que ver nin coas chamadas locais, nin coas autonómicas nin as nacionais”. Para a empresa con sede na Coruña, tamén é importante sinalar que a devandita investigación avalía a calidade dos operadores pero centrándose na telefonía fixa, “deixando de lado servizos máis empregados a día de hoxe polos consumidores, como internet ou a telefonía móbil”.