Ozona pon en marcha unha comunidade solidaria para colaborar con Intermón Oxfam

Ozona Consulting, empresa especializada en virtualización de procesos empresariais (servizos na nube), vén de crear unha iniciativa dixital colectiva destinada a impulsar e fortalecer accións de axuda en países en desenvolvemento. Ozona, que estivo hai pouco en Santiago para organizar un encontro sobre cloud computing para as nosas empresas, pretende que a súa Comunidade Solidaria sexa eficaz para apoiar proxectos de responsabilidade social corporativa. Detrás desta iniciativa, poñendo a semente, atópase un grupo de profesionais da organización da oficina de Barcelona. O seu obxectivo é establecer firmes ligazóns coa organización solidaria Intermón Oxfam, que celebra unha proba (Trailwalker) multitudinaria o 7 de maio na dita cidade catalá.
Ozona Comunidade Solidaria parte dunha vontade clara de apoiar o labor desta ONG, tanto dende o seo mesmo da compañía como dende tódolos eidos posibles: socios, clientes, usuarios e provedores. Segundo conta Loreto Torrellas, responsable de Comunicación Interna de Ozona, o obxectivo de crear un equipo e participar na carreira de Intermón Oxfam permitiulle á empresa traballar de xeito conxunto por un ben social, ombro con ombro cos amigos da compañía, sendo a finalidade última converter o equipo no gañador do certame en volume de fondos recadados. De feito, Intermón Oxfam Trailwaker é un concurso onde se procura, precisamente, poñer a proba as habilidades dos participantes no que a recadación de achegas solidarias se refire. A iniciativa ten sitio propio en Facebook e Twitter.