Castro Caldelas súmase á Rede CeMIT

O Delegado Territorial da Xunta de Galicia, Rogelio Martínez, acompañado polo alcalde de Castro Caldelas, Eladio Osorio, inaugurou hoxe unha nova aula CeMIT (sita no Toural s/n). Con esta nova incorporación á Rede CeMIT (Centros para a Modernización e Inclusión Tecnolóxica) preténdese dotar aos veciños dun espazo aberto de comunicación que se configura como un vehículo para a posta en práctica de iniciativas orientadas a impulsar as TIC e a Sociedade da Información na nosa comunidade autónoma, convertendo esta aula nun servizo apropiado para familiarizar á cidadanía coas canles e soportes audiovisuais e multimedia facilitando o acceso de balde á Internet e conseguindo a alfabetización dixital.
O delegado territorial da Xunta en Ourense, na súa intervención, asegurou que «o goberno galego está a cumprir co compromiso adquirido coa cidadanía, que non era outro que o de contar cunha aula de Modernización e Inclusión Tecnolóxica a menos de trinta minutos da residencia de cada galego e acadar unha aula avanzada. A Rede CeMIT é unha realidade. Ao rematar este ano haberá en funcionamento 94 aulas en 88 concellos de Galicia», dixo.
Desde Ortigueira , a través de videconferencia, o alcalde do municipio, Rafael Girón, inauguraba ó mesmo tempo a aula CeMIT que a Xunta de Galicia abría no seu concello.
A Xunta de Galicia colabora coa dotación e instalación de equipos audiovisuais e multimedia, así como co seu mantemento tecnolóxico, para o que realizou un investimento de 120.000 euros. Amais, incorpora ao concello á Rede CeMIT para que se beneficien do traballo colaborativo en rede e da comunidade virtual CeMIT.