Microsoft e Citrix deron a coñecer en Santiago novas ferramentas de virtualización

Ozona, empresa galega centrada en achegar servizos de computación na nube para as empresas (facilitándolles todo tipo de operacións dende a oficina ou fóra dela e sen que sexa preciso adquirir máis infraestrutura), organizou esta semana en Santiago un evento para dar a coñecer as solucións de virtualización e cloud computing de Microsoft e Citrix. A cita, que se desenvolveu no Centro de Novas Tecnoloxías de Galicia, no barrio de Conxo, tivo como eixe temático fundamental o concepto vAlliance, que é como se denomina á cooperación entre as devanditas compañías para subministrar recursos de computación que axilicen a xestión das empresas.
Xa a un nivel máis específico Microsoft e Citrix centraron a súa intervención en presentar as posibilidades de integrar ferramentas innovadoras de ámbalas dúas empresas para o día a día empresarial, como por exemplo a nova xeración de Citrix Presentation Server e máis os produtos Citrix XenDesktrop, ámbolos dous baseados en Windows Server 2008.
A virtude destes novos servizos, resumindo, baséase en que permiten o emprego de aplicacións baseadas en tecnoloxía Windows “a un custe reducido”, ampliándose a adaptabilidade e a facilidade de uso. Durante o transcurso da xornada desenvolvida en Santiago fíxose fincapé en que con estas ferramentas, os usuarios “conseguen un maior rendemento e condicións de seguridade melloradas”.