IBM cumpre 100 anos este xoves

IBM cumprirá o vindeiro 16 de xuño 100 anos dende que fose fundada en 1911 co nome de Computing Tabulating Recording (C-T-R), mantendo en todo ese tempo a súa misión de axudar ás empresas e á sociedade a progresar a través da innovación, con contribucións como as primeiras tarxetas perforadas de comezos do século XX, as cintas magnéticas de datos, o primeiro grande ordenador empresarial, o primeiro ordenador persoal (PC), o estándar universal do código de barras ou as bandas magnéticas das tarxetas de crédito.
Con máis de 400.000 empregados e presente en 170 países, IBM entra no seu segundo século de vida tras conseguir importantes logros financeiros e de innovación no último ano: un beneficio neto record de 14.800 millóns de dólares e un novo record de rexistro de patentes, converténdoa na primeira compañía en desenvolver máis de 5.896 patentes nun so ano.

Ao longo dos seus 100 anos de historia, o éxito de IBM derivouse esencialmente de tres factores: A súa capacidade para adaptarse aos cambios do mercado e a sociedade do momento, as súas continuas innovacións tecnolóxicas e a súa especialización sectorial.
Os interesados en profundizar no centenario desta compañía poden visitar a páxina web creada a tal efecto, na que recollen as innovacións realizadas por IBM e detalles sobre a celebración do 100º aniversario entre os que resulta especialmente representativo un vídeo no que aparecen un cento de persoas ordenadas (inversamente) por idade, para ilustrar os logros de IBM durante todos estes anos:

Dende que en 1911 nacese en New York a empresa Computing Tabulating Recording Co (C-T-R), predecesora de IBM, a Compañía foi adaptándose ás necesidades do mercado e a sociedade do momento, tratando de ofrecer solucións tecnolóxicas que se traducisen en melloras para a vida das persoas. Así, o seu negocio evolucionou dende a fabricación de tabuladoras, balanzas comerciais ou máquinas de cortar queixo e carne durante os seus primeiros anos de vida, á produción dos primeiros grandes ordenadores empresariais nos anos 60, o primeiro ordenador persoal en 1981 e o desenvolvemento das súas áreas de servizos tecnolóxicos e software empresarial a partir da década dos noventa do século pasado.
Ao mesmo tempo que IBM adaptaba o seu negocio ás necesidades do mercado, tamén ía crecendo e modificando o seu modelo organizativo, co obxecto de gañar en competitividade, axilidade e ser máis flexible. Innovación tecnolóxica.

Entre os seus principais fitos destacan:
· En 1923, as tarxetas perforadas de IBM axudaron a facer fronte a proxectos de grande envergadura, como a creación do censo dos EE.UU.
· En 1934, IBM automatizou o rexistro de cheques nos bancos grazas ao seu equipo 801 Bank Proof.
· En 1944, IBM presentou o Automatic Sequence Controlled Calculator (ASCC), primeiro equipo capaz de realizar cálculos complexos de forma automática.
· En 1964, IBM lanzou o primeiro sistema mainframe (360 System), que foi definido por Thomas J. Watson como o anuncio de produto máis importante da historia de IBM.
· Nos anos 70, IBM creou o disco flexible e comercializou o Univesal Product Code, o estándar dos códigos de barras.
· En 1981, IBM anunciou o primeiro PC, o ordenador persoal de máis éxito de todos os tempos.
· En 1997, o superordenador Deep Blue derrotou a Gary Kasparov, o mellor xogador de xadrez do mundo.
· En 2008, IBM anunciou a súa estratexia Planeta Intelixente (Smarter Planet).