A marcha galega dos parados xa ten páxina web

De estarmos pensando en participar na marcha galega polo emprego cuxo remate está previsto para o 3 de xullo en Compostela, cómpre informar que xa está en marcha unha páxina web para informarnos polo miúdo de todo o que nela se vai esixir, a quen vai dirixida a mobilización e que novidades e informacións hai que ter en conta sobre a convocatoria nos días previos á dita marcha. A web, que vén da man da CIG (do mesmo xeito cá propia manifestación), vén completiña de recursos. Inclúe portada, novas, un apartado para opinión, documentación, vídeos e xanelas directas ás redes sociais.
Cómpre lembrar que a marcha ten como obxectivo reivindicar máis e mellores medidas para reducir o número de parados na nosa terra, que segundo se conta na páxina chegan xa aos 250.000, problema que afecta sobre todo á mocidade. A marcha, que remata o día 3 de xullo en Compostela, ás 12 horas, consiste nunha mobilización a pé polo país, nun principio nas cidades e coa data de inicio prevista para o 29 de xuño.