Axega e R crearán unha canle de televisión interactiva sobre emerxencias e protección cidadá

O Executivo autonómico vén de aprobar o proxecto de acordo que autoriza a sinatura dun acordo entre a Axencia Galega de Emerxencias (Axega) e a compañía de telecomunicacións R para a posta en marcha dunha canle de televisión dixital con servizos interactivos en materia de emerxencias e protección cidadá en Galicia co fin de que a poboación conte cun referente ao que acudir para informarse de calquera emerxencia que aconteza na nosa comunidade.
Os contidos ofrecidos na aplicación de televisión interactiva que terá por nome 112.TV consistirán en información sobre situacións de emerxencia e avisos masivos á poboación como fenómenos meteorolóxicos adversos, emerxencias extraordinarias ou a activación de Plans de Emerxencias e Protección Civil.
Nun primeiro momento a aplicación 112.TV centrarase na consulta de emerxencias activas, a busca de emerxencias por criterios de filtrado e a publicación de comunicados urxentes á poboación. Tamén será posible gozar do servizo de xeito pasivo (subscribíndose aos avisos) ou activo (accedendo á aplicación).