O programas re-Imaxina e Re-Emprende manterán a súa actividade

Economía e Industria, por medio do IGAPE, mantén activos os programas re-ImaXina e re-Emprende, co obxectivo de apoiar os investimentos impulsados por emprendedores, microempresas e novas empresas en período de crecemento e consolidación.
Só mediante o programa re-ImaXina, o IGAPE prevé acadar a mobilización global de 32 millóns de euros -desde o comezo do programa ata o presente exercicio-, destinados a apoiar os investimentos dos emprendedores, as microempresas e as PEME galegas en proceso de desenvolvemento temperán.
Deste xeito, os emprendedores e as PEME son, e seguirán sendo, unha prioridade para a Consellería de Economía e Industria, que lles facilita especial atención a través das liñas de axuda habilitadas a través do IGAPE, ou mediante fondos de capital risco xestionados por Xesgalicia como son o Emprende, o Xes Innova ou o Xes Posibilita.
Coa finalidade de facer posible que as microempresas, as PEME e os emprendedores afronten a crise actual impulsando novos investimentos, o Igape mantén operativo o Programa re-ImaXina, que conta con tres liñas diferenciadas para microempresas (menos de 10 empregados), PEME Nova (de menos de 2 anos) e PEME Competitiva (con máis de 2 anos).
En total case 700 PEME en crecemento, microempresas e emprendedores recibiron ata o momento o apoio do re-ImaXina, un programa pioneiro en Galicia que permitiu estimular un investimento por valor de 20 millóns de euros, dende o comezo da lexislatura.