Pulo á educación virtual da man do Goberno central

Co principal obxectivo de apoiar e potenciar o e-learning na educación superior do noso Estado, onde dito sexa de paso o ensino está a sufrir os recortes de presuposto máis grandes da súa historia, tres entidades públicas estatais veñen de unir forzas para traballar nun mesmo eixo, e darlle á educación en liña o pulo que precisa para atopar o seu oco na sociedade.
Trátase dun convenio asinado pola Universidade Nacional de Educación a Distancia (UNED), a Secretaría de Estado de Telecomunicacións e para a Sociedade da Información e a Fundación Centro Superior para o Ensino Virtual (CSEV), co que se formaliza a inclusión do Ministerio de Industria, Turismo e Comercio dentro do patronato desta última Fundación, constituída a finais do pasado ano para atender a demanda de formación e asesoramento en ensino virtual que se viña dando en España.
Precisamente, a Fundación CSEV foi creada nun contexto de crecente demanda nacional e estranxeira de formación a través de ferramentas virtuais, para atender as posibilidades e necesidades de investigar e desenvolver toda a potencialidade que encerra a aplicación das TIC ao ensino.
Xa que logo, a misión desta Fundación na que agora se inclúe o Ministerio é, segundo afirman, “converterse no referente para o ensino virtual superior, especialmente no espazo iberoamericano do coñecemento”, así como “ser punto de encontro de tódolos actores en ensinos virtuais, centro de xeración de boas prácticas e difusión do coñecemento e foro de debate neste ámbito” engaden.
Para acadar os seus obxectivos, a devandita entidade realiza, entre outras, as seguintes actividades:
-Promove, aplica e divulga investigacións, servizos e proxectos tecnolóxicos innovadores para a educación con metodoloxías virtuais que potencian a interactividade, o uso intensivo de recursos dixitais e as novas tendencias no campo das TIC.
-Realiza servizos e proxectos relacionados coa innovación en metodoloxía aplicada á educación e desenvolve novas técnicas formativas, técnicas de avaliación e certificación de cursos, de materiais formativos e os seus resultados.
-Ofrece formación de formadores e servizos de asesoría e consultoría sobre educación virtual.
-Desenvolve e difunde contidos e materiais formativos.
-Promove e integrase en redes de colaboración con institucións semellantes, especialmente nos ámbitos europeo e latinoamericano.
-Desenvolve programas de formación inclusivos e específicos para profesionais que atenden aos colectivos vulnerables.