Ineo e o CPEIG impulsarán xuntos a modernización da nosa terra

A modernización tecnolóxica da nosa terra non é algo que se poida facer a título individual. Cantos máis sexamos na tarefa, achegando coñecemento e recursos, mellor. Así o entenden a asociación Ineo e máis o Colexio Profesional de Enxeñaría en Informática de Galicia (CPEIG), que veñen de establecer unha alianza co obxecto de promover todo tipo de accións conxuntas que axuden ao fomento da Sociedade do Coñecemento na nosa terra e ao desenvolvemento das novas tecnoloxías. O acordo, que compromete a ámbalas entidades a impulsar traballos conxuntos durante os vindeiros tres anos, foi asinado polos presidentes de Ineo e CPEIG, Jorge Cebreiros e Fernando Suárez, respectivamente.
Xa nun plano máis específico, dicir que a alianza ábrelle a porta a algo máis que accións conxuntas: establece a posibilidade real de abrir cada entidade á participación directa da outra. Ou sexa, que se estipula que un profesional de recoñecido prestixio a proposta do CPEIG participe como membro do Consello Consultivo de Ineo e nos seus proxectos. Do mesmo xeito, os órganos directivos de Ineo participarán en calquera evento que CPEIG poña en marcha e cando corresponda como convidado de honra. “A través deste acordo”, informan as entidades, “os socios de Ineo poderán participar nos actos e eventos que organice o CPEIG coas mesmas obrigas e privilexios dun colexiado, e o mesmo poderán facer os colexiados do CPEIG, que participarán en todo canto evento, proxecto ou servizo se preste dende Ineo nos mesmos termos que un asociado”.