Os enxeñeiros asturianos en Informática desenvolven a partir do 21 a Semana de Impulso TIC

Así como a nosa terra dá acubillo a diversas e moi variadas propostas para promover o uso e afianzamento das novas tecnoloxías, moi preto do país tamén se están a pór en marcha iniciativas análogas. Como por exemplo a Semana do Impulso TIC, celebración incluída no Plan de Impulso TIC iniciado en Asturias para acadar na Comunidade irmá máis e mellor alfabetización dixital, a tódolos niveis e sen fendas nin exclusións que afecten aos de sempre: xeralmente aos que xa están excluídos de servizos previos. Pois ben, segundo nos contan dende Asturias, a Semana en cuestión vaise desenvolver entre o 21 e o 25 deste mes, e o seu obxectivo específico é lograr que a mocidade asturiana remate os seus estudos dominando o emprego útil das novas tecnoloxías.
A iniciativa vén da man das entidades equivalente aos nosos CPETIG e CPEIG, os Colexios de Enxeñeiros Técnicos e Enxeñeiros Informáticos de Asturias, que os días pasados presentaron o programa de actividades. Na cita cos medios informativos, o decano do colexio de enxeñeiros técnicos, Óscar Castro, sinalou que a alfabetización dixital entre a xuventude é hoxe en día “tan importante como dominar o inglés”. A Semana das TIC, incluída no Plan de Impulso TIC, vaise desenvolver principalmente nas cidades de Oviedo e Xixón, onde se afondará, a través de múltiples accións, nos diferentes aspectos do mundo das TIC, abranguendo cuestións como a industria dos videoxogos, a informática no sistema xudicial ou no sistema sanitario, ou as boas prácticas no uso das novas canles.
Segundo fixo saber Ángel Retamar, decano do Colexio de Enxeñeiros Informáticos, “o das novas tecnoloxías é un barrio cheo de posibilidades, no que aínda hai moitas hortas e solares nos que construír”. Ao seu xuízo, investir en novas tecnoloxías é investir “nun sector que repercute no beneficio do conxunto das empresas, que deste xeito verán mellorada a súa produtividade”.
A primeira edición da Semana de Impulso TIC foi presentada esta semana na sede da Federación Asturiana de Empresarios, e dará comezo o vindeiro luns, 21 de novembro, ás 17.00 horas, no Auditorio Príncipe Felipe de Oviedo, no que se contará coa primeira intervención en público do director xeral das Tecnoloxías da Información e a Comunicación, Diego Pascual, quen virá acompañado do presidente da Federación, Severino García, e máis o vicerreitor da Universidade de Oviedo, Víctor Guillermo, xunto cos decanos dos dous colexios organizadores, nas súas siglas CITIPA e COIIPA.