Hideo Kojima dará detalles de Metal Gear Solid 5 este mesmo mes

Tras a publicación de Metal Gear Solid 4 parecía que a saga de Solid Snake remataba definitivamente, aínda que permitíndose licenzas como o xogo de PSP Metal Gear Solid: Peace Walker (que conta unha historia inserida na cronoloxía da saga) ou o moi anticipado Metal Gear Solid: Rising (que podería considerarse un spin-off, por contar con outro protagonista), pero a Revista Oficial de PlayStation no Reino Unido publicará no seu vindeiro número unha entrevista con Hideo Kojima, creador da saga, con quen fan un repaso á súa traxectoria profesional e aproveitan para falar abertamente por primeira vez de Project Ogre e de Metal Gear Solid 5.
Haberá que agardar ao 29 de novembro para ver o novo número da devandita revista nas tendas británicas (tamén dispoñible como descarga dixital para dispositivos con iOS), de xeito que en poucos días teremos unha vaga de informacións relativas ao novo xogo do que aínda non temos ningunha información oficial, e que promete dar moito que falar nos vindeiros meses.