A Fundación Averhó forma en animación 3D a 12 persoas con discapacidade

Un total de 12 alumnos e alumnas con discapacidade recibiron hoxe da man da conselleira de Traballo e Benestar, Beatriz Mato, os diplomas que acreditan a súa formación durante máis de 700 horas como técnicos especialistas en animación 3D. Mato, quen estivo acompañada polo secretario xeral de Cultura, Anxo Lorenzo, explicou no transcurso deste acto que se celebrou en A Coruña, que o Goberno galego colaborou coa Fundación Averhó para a formación destas persoas investindo, ao igual que en 2010, máis de 100.000 euros para facer posible esta acción. Polo tanto, é o segundo ano consecutivo que o Goberno galego apoia esta iniciativa, incidiu.
Este programa, que apoia a Consellería de Traballo e Benestar, permite aos seus participantes formarse nun ámbito “con boas expectativas de inserción laboral” , en palabras de Beatriz Mato, conselleira que tamén indicou que a colaboración con este tipo de iniciativas vai na liña dos principais eixos do Plan Integral de Acción para as Persoas con Discapacidade 2010-2013 que está a executar o Goberno galego.
Fixo referencia a que unha das principais actuacións do departamento autonómico é colaborar con este colectivo na inserción laboral.
Por último, a titular de Traballo destacou que o Goberno galego investirá ao longo de 2012 máis de 14,5 millóns de euros para fomentar a contratación de persoas con discapacidade e indicou que para formación de persoas desempregadas en xeral destinaranse máis de 55 millóns.