Vanity Fair fai un balance negativo do período no que Ballmer encabeza a dirección de Microsoft

A revista Vanity Fair está a captar moita atención nos EE.UU. por unha interesante reportaxe dedicada á década perdida de Microsoft, na que fan un repaso aos erros cometidos pola compañía de Redmond nos últimos anos que a levaron a perder a súa posición de liderado no sector tecnolóxico que souberon aproveitar Google, Apple e Amazon, entre outros.
Para esta impresionante reportaxe tomaron como base ducias de entrevistas e rexistros internos (incluíndo correos electrónicos entre directivos da empresa), debullando o interior de Microsoft durante os anos nos que Steve Ballmer está na cabeza da compañía.
Un dos principais erros de Microsoft resultarían imposibles de ver dende fóra, e corresponderían a un problema de dirección na que as unidades de traballo analizaríanse dun xeito peculiar na que só se verían recompensados os mellores de cada equipo, o que levara aos traballadores a competir cos seus compañeiros en vez de con outras empresas.
Tamén citan exemplos moi ilustrativos como o feito de que en 1998 Bill Gates desbotase un prototipo de lector de libros electrónicos por considerar que a súa interface de usuario era demasiado diferente á de Windows, o que faríalles perder unha oportunidade de negocio moi rendible por culpa de prexuízos persoais provocados en boa medida por pensar que a posición no mercado do Windows era inamovible.
Incluso mencionan que un dos desenvolvedores máis novos de MSN Messenger suxeriu a incorporación de actualizacións de estado para atender certa demanda por parte dos mozos, entendendo que así facilitábase certa comunicación cos amigos que iría máis aló do chateo, o que non souberon entender os responsables do proxecto, que non entendían o uso da mensaxería instantánea que facían os novos e, en consecuencia, non facían nada para adaptarse e, sumando moitas decisións semellantes, chegouse a unha situación na que Microsoft deixou de ter atractivo, aínda que dende a revista norteamericana parecen esquecer que Microsoft tamén tivo acertos nos últimos anos, como o que conseguiron coa Xbox 360, consola que nos EE.UU. é líder no seu ámbito, establecendo as bases do que hoxe entendemos como unha boa experiencia de xogo en liña e empregando as consolas como fiestra ao lecer electrónico no salón.