A Academia Galega do Audiovisual di que a suba do IVE, unida á piratería, afundirá o sector

Os problemas de financiamento que ten a nosa industria da creatividade, problemas que se deixan notar dende hai tempo nun menor número de obras e produtos, irían a máis coa vindeira suba do IVE. Tanto é así que se poría ás empresas galegas ao bordo da quebra. Así o considera a Academia Galega do Audiovisual, que vén de dar a coñecer, nun comunicado oficial, a súa opinión sobre o incremento dos impostos preparado polo Goberno central. A asociación amosa “o seu total desacordo coas medidas do Executivo en relación co sector da cultura e máis concretamente coa subida do IVE, a máis dura da Unión Europea dentro do seu ámbito”. Segundo apunta a Academia, todo está en claro perigo: o cinema, o teatro, a televisión dixital, a arte, a industria dos videoxogos, etc.
Estes e outros eidos de actividade, incide a asociación de profesionais e empresas do audiovisual, “non poden asumir unha suba de 13 puntos no IVE (do 8% ao 21%, é dicir un 150%), entre outras medidas, e non servirá para que o Estado recade máis fondos porque a demanda diminuirá fortemente provocando a destrución de postos de traballo, peche de empresas e o aumento do xa de por si grave problema das descargas ilegais”. Polo tanto, sinálase, a medida botaría leña ao lume da crise, ao pasarmos a ter o IVE máis alto de toda a UE e ao obrigar á comunidade de consumidores destes produtos a renunciar finalmente ao xusto pago por acceder a eles, optando, xa que para moitos non haberá máis remedio, pola vía da descarga sen autorización.
Todo isto, di a Academia, mataría ao cinema e máis ás salas, as poucas que quedan. E engade: “Nos últimos anos vemos como cada vez van quedando menos cines e os que quedan ven, ano tras ano, reducidos os seus ingresos polo efecto da piratería; sabendo todo isto é bastante nidio que esta suba do imposto, que triplica o actual, será o toque de graza para o sector e suporá menos ingresos para o Estado –ao contrario do que pretende a medida- e milleiros de persoas máis nas colas do paro”.