Estáncase a venda de libros electrónicos

O libro electrónico, malia ser un dispositivo excelente para levar toda unha biblioteca ás costas sen importar o lonxe que viaxemos, non está a resultar atractivo dabondo para a sociedade actual, que segue a apostar polo libro físico de toda a vida para as súas lecturas.
Así se deduce dun estudo que vén de realizar a Asociación Norteamericana de Editores a partir das súas estatísticas anuais, que corroboran que a venda de libros electrónicos estancouse en 2011, manténdose agora “planas, con apenas un crecemento do 0,5%”, e que os libros físicos seguen a dominar o mercado actual.
O estudo, para o que se contou coa colaboración de 1.977 editoriais, indica que en 2011 vendéronse 388 millóns de libros electrónicos, fronte aos 125 millóns de unidades en 2010. Vemos, polo tanto, que as vendas de 2010 a 2011 incrementáronse nun 58%, e que os ingresos pasaron de 571 millóns a 895 millóns de euros nun só ano.
Porén este ano as vendas botaron o freo, e de igual maneira os beneficios decreceron levemente.
Segundo o informe, os editores están a vender máis libros pero a un prezo “máis axustado”, e iso é o que explica que malia ver incrementadas as vendas do formato electrónico nun 3,4% (ata acadar os 2.770 millóns de unidades vendidas), os ingresos rexistrados non superan os do 2011.
O positivo de todo isto é que os libros electrónicos que máis se están a vender son os que teñen como público obxectivo a infancia e a adolescencia, cun incremento do 12% respecto a 2010, co cal temos un claro indicador de que o futuro para sector é prometedor, se a tendencia á alza continúa nos futuros adultos.