Skype substituirá ao Messenger a primeiros de 2013

Onte comentamos o ruxerruxe que apuntaba a que Microsoft podería preparar a xubilación do seu Messenger, e poucas foron as horas que tardou en confirmarse, de xeito que xa é oficial que Skype e Messenger van fusionarse, de xeito que os usuarios do Windows Live Messenger poderán atopar aos seus amigos dende Skype, tanto para funcións de mensaxería instantánea como para realizar videoconferencias. Este paso víase vir dende o lanzamento hai poucos días da versión 6.0 da aplicación de Skype para OS X e Windows, que facilitaba a identificación en Skype con contas de Microsoft e Facebook, de xeito que permite empregar esta ferramenta do mesmo xeito que ata o momento facíase co Messenger de Microsoft.
Os usuarios actuais do Messenger poden ir migrando a Skype de xeito paulatino, aínda que é recomendable que muden a Skype o antes posible, xa que no primeiro trimestre de 2013 deixará de funcionar en case todo o mundo o servizo de Messenger, pasando a ser totalmente substituído por Skype.
Entre as vantaxes de mudar a Skype está un abano de dispositivos máis amplo (incluíndo o iPad e tablets con Android); a posibilidade de empregar unha única ferramenta para mensaxería instantánea, a videoconferencia e as chamadas a teléfonos fixos e móbiles; a compartición de pantalla; videoconferencias dende móbiles; videoconferencias con amigos de Facebook; e videoconferencias grupais.