BlackBerry Messenger permitirá facer chamadas de voz a través de Wi-Fi

Aínda que o servizo BlackBerry Messenger está a perder pulo fronte a WhatsApp e outras plataformas de comunicación en grupo, dende RIM non tiran a toalla, e na versión 7.0 está a incorporarse o servizo BBM Voice, que permite facer chamadas de voz sobre IP a través de Wi-Fi entre usuarios de terminais BlackBerry, e que actualmente está en fase de probas.
Deste xeito a aplicación BBM non se limitará a chats en tempo real, senón que facilitará o establecemento de comunicacións de voz sen consumir minutos da nosa tarifa telefónica, aínda que polo momento tal funcionalidade limitaríase a conexións Wi-Fi, pois de empregarse a través de 3G podería entrar en conflito coas compañías de telecomunicacións, pois podería ter un impacto moi importante no uso que se fai das súas redes (incrementando o tráfico de datos e reducindo os minutos de voz facturados).
Actualmente xa hai plataformas de comunicación en tempo real como Viber e LINE que ofrece a posibilidades de realizar chamadas de VoIP de balde, e nunha liña semellante a versión de proba de BBM presenta unha icona na listaxe de contactos do programa para amosar se están dispoñibles para unha chamada de voz a través de Wi-Fi, momento non que continuará a ser posible manter un chat tradicional para compartir imaxes ou outros contidos, sendo unha solución compatible co altofalante e con sistemas de mans libres Bluetooth, polo que sería tan versátil como unha chamada de voz tradicional, pero coa vantaxe de resultar totalmente de balde.