A cadea de tendas K-tuin establecerase na Coruña a semana que vén

En 2007 naceu na rúa Federico Tapia nº 43 da Coruña unha tenda chamada Play, especializada en produtos de Apple, que durante todo este tempo non só ofrecía os produtos da compañía da mazá, senón que tamén acollía numerosas actividades formativas ao seu redor, pero este establecemento vai reformularse o vindeiro día 18, cando ás 19:00 horas celebrará a súa transformación nunha tenda da cadea K-tuin, nacida en Madrid en 1994 e que actualmente conta con 8 tendas repartidas por Alacante, Andorra, Barcelona, Pamplona, Zaragoza e Madrid, converténdose na meirande rede de centros de Apple de España.

A transformación de Play en K-tuin celebrarase con sorteos e agasallos, aos que habería que sumar un 10% de desconto en todos os ordenadores Mac durante os días 18, 19 e 20 de abril. A cadea de tendas K-tuin sostén que ten como vantaxes unha compra segura (inclúe seguros a todo risco de balde cos Mac), unha compra máis económica (un 5% de desconto para os usuarios que utilicen a súa tarxeta), facilitades de financiamento (pagamento en 10 meses sen xuros), seminarios diarios de balde, un grande catálogo de complementos e a posibilidade de atender compras en liña.